حیوانات کی دنیا (11) ۔ شکرگزاری

کیا جانور شکرگزار ہو سکتے ہیں؟ اس سوال کے جواب میں ایک مسئلہ یہ ہے کہ آپ شکر گزاری کو کیسے ناپ سکتے ہیں یا اتنا ہی مشکل سوال یہ کہ اس کی تعریف کیسے کر سکتے ہیں؟ اگر آپ انٹرنیٹ پر تلاش کریں گے، تو آپ کو بہت سی بحث ملے گی لیکن کوئی حتمی بات نہیں۔ تاہم بنیادی طور پر جو بات زیادہ تر تعریفوں سے سامنے آتی ہے وہ یہ ہے کہ شکر گزاری ایک مثبت جذبہ ہے جو کسی فرد سے یا کسی عمل کی وجہ سے ہونے والے خوشگوار تجربے سے پیدا ہوتا ہے۔ شکر گزار ہونے کے لیے، آپ کو یہ پہچاننے کے قابل ہونا چاہیے کہ کسی نے آپ پر احسان کیا ہے۔
"رومن فلسفی سیسیرو شکر گزاری کو تمام خوبیوں میں سب سے بڑی خوبی سمجھتے تھے، اور ان کا خیال تھا کہ کتے اسے محسوس کرنے کی صلاحیت رکھتے ہیں۔ لیکن یہ معاملہ پیچیدہ ہے۔ میں کیسے جان سکتا ہوں کہ کوئی جانور یہ پہچانتا ہے کہ کوئی فرد یا کوئی عمل اس کے خوشگوار تجربے کا سبب بنا؟ خود خوشی کے برعکس (جسے کتے میں پہچاننا آسان ہے)، یہ سوال بھی ہے کہ کیا کتا اپنی خوشی کے سبب پر کوئی غور کرتا ہے؟ اس سوال کا جواب دینا نسبتاً آسان ہے۔ اس کے لئے کھانے کی مثال موجود ہے۔ کتا اپنے کھانے سے خوش ہے اور جانتا ہے کہ اس کا پیالہ کس نے بھرا۔ درحقیقت، کتے اکثر اپنے مالک کو اس عمل کو دہرانے کی ترغیب دیتے ہیں۔ لیکن کیا یہ واقعی شکر گزاری ہے؟ آپ اسے اتنی ہی آسانی سے بھیک مانگنا کہہ سکتے ہیں۔ کیا حقیقی شکر گزاری میں ایک ذہنیت، زندگی کو دیکھنے کا ایک طریقہ شامل نہیں ہوتا؟ مسلسل مزید کی خواہش کیے بغیر چھوٹی خوشیوں کو منانے کی صلاحیت؟ اس نقطہ نظر سے دیکھا جائے تو، شکر گزاری تب ہوتی ہے جب آپ کے اپنے بنائے ہوئے حالات کے بارے میں خوشی اور اطمینان ایک ساتھ مل جائیں۔ بدقسمتی سے، اس قسم کی شکر گزاری کو ابھی تک جانوروں میں ثابت نہیں کیا جا سکتا—ہم ان کی زندگی کے اندرونی نقطہ نظر کے بارے میں قیاس آرائی کرنے سے زیادہ کچھ نہیں کر سکتے۔ ہو سکتا ہے کہ کسی کتے کا مالک یہ بات پورے وثوق سے کہے لیکن بہرحال اسے سائنسی لحاظ سے ثابت نہیں کیا جا سکے گا۔
لیکن جانوروں کی دنیا میں دیگر مثالیں موجود ہیں۔ کیا وہ اس مسئلے پر مزید روشنی ڈال سکتی ہیں؟ میکسیکو میں بحیرہ کورتیز میں ایک ہمپ بیک وہیل کی کہانی ہے۔ یہ وہیل ماہی گیری کے ایک جال میں بری طرح سے پھنس گئی تھی۔ مائیکل فشباخ نامی ایک شخص نے اس کی زندگی بچائی۔ جب فشباخ وہیل سے ملا، تو ایسا لگ رہا تھا کہ وہ زیادہ دیر تک زندہ نہیں رہ سکے گی۔ فشباخ فوری طور پر صرف ایک چھوٹی سی چھری سے لیس ہو کر پانی میں داخل ہوا۔ گھنٹوں تک اس جال کو کاٹ کر وہیل کو آزاد کیا۔  وہیل نے آزاد ہونے کے بعد فشباخ کی کشتی کے آس پاس ایک گھنٹے تک شاندار کرتبوں کا مظاہرہ کیا۔ اس میں وہیل نے چھلانگیں لگائیں، اپنے پنکھ مارے۔ یہ اس کشتی کے مسافروں کے لئے اظہار تشکر تھا جنہوں نے اسے یقینی موت سے بچایا تھا؟
۔۔۔۔۔۔۔۔۔۔
ایک کہانی جنگلی کووں کی۔ کوّوں کو چمکدار چیزیں جمع کرنا پسند ہے اور کوّوں کو کھانا بھی پسند ہے۔
گابی چار سال کی تھی اور باہر بیٹھ کر کھاتے ہوئے کئی چیزیں زمین پر گرا دیتی تھی۔ کوے ان پر جھپٹنے میں کوئی وقت ضائع نہیں کرتے تھے۔ اگلے سالوں میں گابی نے جان بوجھ کر اپنا لنچ کوّوں کے ساتھ بانٹنا شروع کر دیا۔ پھر اس نے اپنے گھر کے پچھواڑے میں روزانہ کی بنیاد پر کوّوں کو کھانا کھلانا شروع کیا۔ اس کے فوراً بعد، پرندے اسے تحائف لانے لگے: شیشے کے ٹکڑے، پیچ، ہڈیوں کے ٹکڑے، ٹوٹے ہوئے زیورات۔ ایک بار گابی کی ماں، لیزا، نے کوّوں کی تصویر کشی کرتے ہوئے اپنے کیمرے کا لینس کیپ گرا دیا اور سوچا کہ یہ گم ہو گیا ہے، صرف چند دن بعد اسے برڈ فیڈر پر وہیں پایا۔ کوّوں نے اسے واپس کرنے سے پہلے احتیاط سے دھویا بھی تھا۔ کیا یہ شاید شکر گزاری ہے؟ کوّے یقینی طور پر لوگوں کو پہچاننے اور ان لوگوں کے لیے مضبوط جذباتی ردعمل رکھنے کے لیے جانے جاتے ہیں جنہیں وہ پسند نہیں کرتے۔
"اس معاملے میں، ایسا لگتا ہے کہ وہ گابی کو بہت پسند کرتے تھے، اور شاید وہ شکر گزار تھے اور اتنے سالوں تک ان کی دیکھ بھال کرنے پر اس کا شکریہ ادا کر رہے تھے۔
(جاری ہے)