جسم کے راز (10) ۔ جنین کی مرمت

زرنیکا-گوئٹز کے ہاں دوسرے بچے کی پیدائش ہونی تھی۔ چونکہ ان کی عمر چالیس سال سے زائد تھی تو ڈاکٹر نے جینیاتی ٹیسٹ تجویز کیا تھا۔ اس کے ایک چوتھائی خلیات میں کروموزوم 2 کی اضافی کاپی تھی۔ لیکن انہیں معلوم نہیں تھا کہ اس کا کیا مطلب ہو سکتا ہے۔ وہ اس پر سائنسی لٹریچر کنگھالتی رہیں۔ خلیات پلاسنٹا سے لئے گئے تھے، براہ راست بچے سے نہیں۔  زرنیکا-گوئٹز نے نتیجہ اخذ کیا کہ تین چیزیں ممکن ہو سکتی ہیں۔ بہترین صورت یہ ہو گی کہ یہ نقص صرف پلاسنٹا میں ہے۔ اور اس وقت آیا جب پلاسٹنا بن رہا تھا۔ بچے میں سب کچھ ٹھیک ہے۔ دوسرا امکان یہ تھا کہ نقص بچے سے شروع ہوا ہو اور پلاسنٹا میں پہنچا ہو۔ تیسرا یہ کہ جس طرح ایک چوتھائی خلیات پلاسنٹا میں خرابی والے ہیں، ویسے ہی بچے میں بھی ہوں۔
ڈاکٹروں نے انہیں بتایا کہ نارمل اور خراب خلیات اکٹھے ہونا اتنا نایاب نہیں۔ ان کے لئے یہ بات حیرت انگیز تھی اور انہوں نے اپنی سائنسی تحقیق کو اس طرف موڑ لیا۔ لیبارٹری میں چوہوں کے جنین میں اگر خراب خلیہ داخل کیا جائے تو کیا ہو گا؟ یہ انہوں نے آٹھ خلیات والے جنین کے ساتھ کرنا شروع کیا جس میں کچھ خلیات ایبنارمل ہوں۔ ان کے لئے ایک اور حیران کن نتیجہ تھا۔ جس طرح جنین پرورش پاتا اور بڑھتا، خراب خلیات مر جاتے تھے۔ پڑوس میں بسنے والے صحت مند خلیات ان ضائع ہونے والے خلیات کی جگہ لینے پہنچ جاتے تھے۔ اور کچھ صحت مند خلیات تو خراب  اور مردہ خلیے کی باقیات یو نگل کو اس کا وجود فنا کر دیتے تھے۔
خراب خلیات داخل کرنے کے باوجود جو بچہ پیدا ہوتا تھا، وہ مکمل طور پر صحت مند تھا۔ یہاں تک کہ اگر نصف خلیات میں بھی خرابی ڈال دی جائے تو یہ درست کر لی جاتی تھی۔ اگر دو تہائی خلیات میں خرابی ڈال دی جائے، تو بھی چالیس فیصد امکان تھا کہ یہ درست کر لی جائے گی۔ انہوں نے دریافت کیا کہ کم از کم چوہوں کے جنین اس قدر لچک رکھتے ہیں کہ چند خلیات کی خرابی پیدا ہونے والے بچے پر کوئی فرق نہیں ڈالتی۔
۔۔۔۔۔۔۔۔
ایک ماہ بعد زرنیکا-گوئٹز نے پھر ٹیسٹ کروایا جس سے معلوم ہوا کہ بچے کے خلیات میں جین ٹھیک ہیں۔ جنوری کو ان کے ہاں صحتمند بچے کی پیدائش ہوئی۔
تاہم، اس بارے میں علم ابھی کم ہے کہ یہ سب ہوتا کیسے ہے۔ زرنیکا-گوئٹز خوش قسمت تھیں کہ سب کچھ ٹھیک رہا۔ لیکن درست میڈیکل تجویز کیا ہونی چاہیے؟ یہ واضح نہیں ہے۔
۔۔۔۔۔۔۔۔
زرنیکا گوئٹز کی دریافت کہ جنین میں خراب خلیات کو ختم کر دیا جاتا ہے، ان کی پہلی بڑی کامیابی تھی۔  ان کی زیادہ بڑی کامیابی ابھی آنی تھی۔
(جاری ہے)