فرض کریں کہ آپ ایک خلائی مخلوق (Alien) ہیں جس کے پاس ایک بہت ہی طاقتور دوربین ہے۔ آپ اس کی مدد سے زمین کو دیکھ کر یہ سمجھنے کی کوشش کر رہے ہیں کہ یہاں پر کیا ہو رہا ہے۔ آپ کی نظر ایک فٹ بال میچ پر پڑتی ہے، لیکن آپ کی دوربین اتنی طاقتور نہیں کہ گیند کو دیکھ سکے۔ آپ ایک میدان میں کھلاڑیوں کو حرکت کرتے ہوئے دیکھ سکتے ہیں۔ آپ کو بظاہر کسی نہ کسی قسم کی تنظیم تو دکھائی دے رہی ہے، لیکن یہ سمجھنا مشکل ہے کہ دراصل ہو کیا رہا ہے۔ آپ اس مشاہدے کو اپنے سیارے کے سائنسی جریدے میں شائع کرتے ہیں۔ چند دوسرے ایلین آپ کو اس دریافت پر مبارک باد دیتے ہیں لیکن اسے زیادہ توجہ نہیں ملتی۔
وقت گزرنے کے ساتھ، دوربینیں بہتر ہو جاتی ہیں۔ پھر کبھی کبھار آپ گول کے سامنے کسی کھلاڑی کو گرتے ہوئے دیکھتے ہیں۔ کبھی کبھی اس کے بعد میدان کے ارد گرد موجود لوگوں کا ہجوم اچھلتا کودتا اور خوشی مناتا ہے۔ یہ اب بھی زیادہ سمجھ میں نہیں آتا، لیکن جریدے میں شائع ہونا والا آپ کا یہ مشاہدہاس بار کچھ بحث کا باعث بنتا ہے۔ آپ کو تحقیق جاری رکھنے کے لئے فنڈنگ مل جاتی ہے۔ چند برس گزر جاتے ہیں۔ آپ کی عمر تو ڈھل رہی ہے لیکن آپ کے ساتھ کام کرنے والا ایک نوجوان ایلین ایک دلچسپ چیز دیکھتا ہے۔ جب گول کے سامنے کھلاڑی گرتا ہے، تو ہجوم خوشی مناتا ہے یا نہیں، اس کا انحصار ایک چیز پر ہے: آیا گول کا جال باہر کی طرف پھولتا ہے یا نہیں۔ یہ آپ کے نوجوان ساتھی کو ایک شاندار خیال دیتا ہے۔
وہ قیاس کرتا ہے کہ شاید وہاں کوئی ایسی چیز ہو جو جال کے پھولنے کا سبب بنتی ہو – ایک گیند – یہ گیند چھوٹی ہے اور دوربین سے قابل مشاہدہ تو نہیں ہے۔ پہلے تو آپ اس بات کو مسترد کر دیتے ہیں۔ لیکن یہ خیال آپ کے دل میں جگہ لینے لگتا ہے۔ اگر ایک گیند کو مان لیا جائے تو باقی سب کچھ سمجھ میں آنے لگتا ہے۔ کھلاڑیوں کی حرکت، جال، ہجوم کی اچھل کود، پورا کھیل۔ وقت کے ساتھ دیگر ایلین سائنسدان بھی متفق ہو جانے لگتے ہیں کہ وہاں ایک گیند ضرور ہونی چاہیے۔ اگرچہ کوئی بھی گیند کو براہ راست نہیں دیکھ سکتا، ہر کوئی اس بات پر متفق ہے کہ وہ وہاں ہے۔ کیونکہ اگر وہ ہے تو بہت سی چیزیں سمجھ میں آتی ہیں۔ آپ، آپ کا ساتھی اور وہ خلائی مخلوق جس نے سپر طاقتور دوربین ایجاد کی تھی، بہت سے انعامات حاصل کرتے ہیں۔ ہو سکتا ہے کہ کبھی مستقبل میں دوربینیں مزید طاقتور ہو سکیں تاکہ آخر کار گیند کو دیکھا جا سکے۔ لیکن اسی طرح، یہ بھی ہو سکتا ہے کہ ایسا کبھی بھی نہ ہو۔ شواہد کا ایک بھاری وزن یہ بتاتا ہے کہ گیند وہاں ہے، لیکن ہو سکتا ہے کہ اس کا کوئی براہ راست ثبوت نہ مل سکے۔
۔۔۔۔۔۔۔۔۔۔۔
سائنس کے فلسفے میں، یہ بحث طلب ہے کہ کیا کسی بھی چیز کو مکمل طور پر ثابت کیا جا سکتا ہے۔ اس بات کا کوئی ثبوت نہیں ہے کہ سورج کل دوبارہ طلوع ہو گا، صرف شواہد کا ایک بھاری وزن ہے جو کہتا ہے کہ ایسا ہو گا۔ یہی علم کے سفر میں دریافتوں کی نوعیت ہے۔
۔۔۔۔۔۔۔۔۔۔۔
ایلین اور کھیل کی یہ کہانی بتاتی ہے کہ بہت سی دریافتیں کیسے ہوتی ہیں۔ مثال کے طور پر، سیارہ نیپچون کی دریافت کو لے لیں، جو پہلی بار 1846 میں دیکھا گیا تھا۔ ایک اور سیارے، یورینس کی حرکت کو احتیاط سے ٹریک کیا گیا تھا۔ ریاضی کے حسابات نے دکھایا کہ یہ سورج کے گرد ایک سادہ مدار پر پوری طرح سے نہیں چل رہا تھا۔ اس کی وضاحت کی جا سکتی ہے کہ اگر ایک ان دیکھا سیارہ یورینس پر کھینچ رہا ہو اور اس کے راستے کو متاثر کر رہا ہو۔ برطانوی اور فرانسیسی ماہرین فلکیات نے حساب لگایا کہ اگر وہ یورینس کی حرکت میں بگاڑ کی وضاحت کرتا ہے تو ایسے سیارے کو کہاں واقع ہونا چاہیے۔ پھر، عین پیش گوئی شدہ جگہ پر دوربین لگا کر، نیا سیارہ دیکھا گیا – نیپچون۔ آج، ستاروں اور کہکشاؤں کی حرکت کی وضاحت کے لیے ڈارک میٹر نامی ایک مادہ اور ڈارک انرجی نامی ایک قوت کے وجود کی پیش گوئی کی جاتی ہے۔ ابھی تک، دونوں ان دیکھے ہیں۔
۔۔۔۔۔۔۔۔۔۔۔
تاریخ کے تقریباً تمام ادوار میں، انسانی جسم کے زیادہ تر عجائبات نظروں سے اوجھل رہے ہیں اور ان کا تصور کرنا بھی مشکل تھا۔ ہماری کچھ اندرونی ساخت – ہڈیاں، پٹھے اور چند بڑے اعضاء – ہمیشہ سے جانچے جا سکتے تھے۔ لیکن ہمارے جسم کے زیادہ تر راز، تاریخ میں بہت عرصے تک مفروضوں اور قیاس آرائیوں کا مواد رہے ہیں۔ سترہویں صدی کے آخر میں مائیکروسکوپ کی ایجاد سے خلیات کی دریافت نے انسانی حیاتیات کی ہماری جدید تفہیم کا آغاز کیا، اور بیسویں صدی کے وسط میں ڈی این اے کی ساخت کی دریافت ایک اور بہت بڑا قدم آگے تھا کیونکہ اس نے ظاہر کیا کہ جینیاتی معلومات کو کیسے ذخیرہ اور نقل کیا جاتا ہے۔ تاہم، حال ہی میں، تکنیکی اور سائنسی انقلابات کا ایک مکمل سلسلہ رونما ہوا ہے جو انسانی جسم کے اندر چھپے ہوئے مناظر کو پہلے کبھی نہیں دیکھا گیا انداز میں ظاہر کر رہا ہے – کچھ مفروضوں کی تصدیق کر رہا ہے، دوسروں کو کمزور کر رہا ہے، اور سب سے بڑھ کر، نظریاتی اور عملی دونوں طرح کے امکانات کے ایک بالکل نئے دائرے کی طرف لے جا رہا ہے۔
(جاری ہے)
یہ سیریز اس کتاب کا ترجمہ ہے۔
The Secret Body: How the New Science of the Human Body Is Changing the Way We Live
By Daniel M. Davis
کوئی تبصرے نہیں:
ایک تبصرہ شائع کریں