حیوانات کی دنیا (52) ۔ بے زبان؟

ہم کبھی نہیں جان پائیں گے کہ کیا خوف، غم، مسرت یا خوشی جانوروں کو ہمارے لیے ویسا ہی محسوس ہوتی ہے جیسا کہ ہمیں ہوتی ہے۔ ہم تو انسانوں میں بھی یقین سے یہ بھی نہیں کہہ سکتے کہ ایک شخص دوسرے کی طرح محسوس کرتا ہے۔ کانٹا چبھنے پر کوئی اونچی آواز میں چیخ اٹھے گا جبکہ کسی کو بمشکل کچھ محسوس ہوتا ہے۔ لیکن ہم ایک دوسرے سے بات کر سکتے ہیں، اس وجہ سے ہم یہ اندازہ لگا سکتے ہیں کہ دوسرے لوگ کیا محسوس کر رہے ہیں۔ ہم جانوروں کے ساتھ ایسا نہیں کر سکتے۔
لیکن کیا واقعی؟ کووں کے مطالعے ایک مختلف کہانی بیان کرتے ہیں۔ مختلف آوازوں—کچھ اونچی، کچھ نیچی—کا استعمال کرتے ہوئے نئے آنے والوں کو سلام کرنا ان کی زبان کا فوری تاثر دیتا ہے۔ لیکن بات چیت صرف آوازوں میں نہیں ہے۔ ہمارا بھی دوسروں کے ساتھ، رابطے کا ایک خاص حصہ غیر زبانی ہوتا ہے—چہرے کے تاثرات، اشاروں اور جسم کی بولی کے ذریعے منتقل ہوتا ہے۔ اس بارے میں سائنسی اتفاق اسی پر ہے کہ گفتگو کا زبانی مواد اس کے معنی کا صرف تھوڑا حصہ بتا سکتا ہے۔
تو پھر جانوروں کے بارے میں؟ ہماری طرح، کوے صرف آوازوں پر انحصار نہیں کرتے ہیں۔ میکس پلانک انسٹی ٹیوٹ فار آرنیتھولوجی میں سائمن پکا کے ساتھ کام کرنے والے محققین نے دریافت کیا کہ یہ ذہین پرندے اپنی چونچوں کو بالکل اسی طرح استعمال کرتے ہیں جس طرح ہم اپنے ہاتھوں کو استعمال کرتے ہیں۔ جب کہ ہم کسی چیز کی طرف انگلی سے اشارہ کرتے ہیں یا کسی چیز یا اپنی طرف کسی اور کی توجہ مبذول کروانے کے لیے ہاتھ اٹھاتے ہیں اور لہراتے ہیں، کوے اپنی چونچوں سے اشیاء کو اٹھاتے ہیں۔ وہ کسی چیز کی طرف اشارہ کرنے یا مخالف جنس کے کسی رکن کی توجہ مبذول کروانے کے لیے بھی اپنی چونچوں کا استعمال کرتے ہیں۔ ایک وسیع صوتی "لغت" اور جسمانی حرکات کی ایک تعداد کے ساتھ جسے وہ صورتحال کے مطابق ایڈجسٹ کر سکتے ہیں، ان کے پاس اپنا مافی الضمیر بتانے کی تفصیلی صلاحیت ہے۔ انہیں اس کی ضرورت اس لئے بھی ہے کیونکہ کوے اپنی تقریباً پوری زندگی ایک ساتھ گزارتے ہیں، اور انہیں رابطوں کے طریقوں کی ضرورت ہے۔
اور یہ دریافت ان سیاہ پرندوں کی اندرونی زندگی پر ایک چھوٹی سی کھڑکی کھولتی ہے۔ ابھی ہم بہت کچھ نہیں جانتے۔ ہمارے جنگل والے گھر میں ایک اور ایسا ہی "مترجم" تھا۔ ہمارے بچوں کو تحفے کے طور پر بجری گر کا ایک جوڑا دیا گیا تھا، اور نر جانتا تھا کہ توجہ کیسے حاصل کرنی ہے۔ جب وہ کھانا چاہتا تھا، تو وہ اپنا پیالہ اٹھاتا اور اسے گرا دیتا۔ اس کے پنجرے میں بہت سے دوسرے کھلونے تھے، اس لیے واضح طور پر یہ اشارہ ایک مقصد پر مبنی پیغام تھا جو یہ فرمائش کرتا تھا: “ذرا، اس پیالے کو بھر دیں!"
لیکن اشاروں کو چھوڑ کر واپس زبان پر آتے ہیں۔ کتے نہ صرف بھونک سکتے ہیں، بلکہ وہ مختلف قسم کی آوازیں بھی نکال سکتے ہیں جنہیں وہ عام طور پر اپنی بات بتانے کے لیے استعمال کرتے ہیں— دوسرے کتے آوازوں کے درمیان زیادہ درست طریقے سے فرق کرتے ہیں، جبکہ ہم صرف عمومی پیغام کو ڈی کوڈ کر سکتے ہیں۔ ہمیں یہ تاثر ملا کہ یہ ہمارے کتے کے ساتھ ہو سکتا ہے۔ جیسے جیسے سال گزرتے گئے، ہم نے سیکھا کہ کیا وہ ہمیں بتانا چاہتا تھا۔ بھوک لگ رہی ہے، یا بوریت ہو رہی ہے، یا اس کا پانی کا پیالہ خالی ہے۔  
(جاری ہے)